Fabiano Karuana chempion bo'lgan turnirda Nodirbek Abdusattorov nechanchi o'rinni egalladi?

O'z ichiga 5 ta turnirni jamlagan ushbu nufuzli shaxmat musobaqasining umumiy mukofot jamg'armasi 1,5 million AQSH dollarini tashkil etadi. Unda hamyurtimiz Nodirbek Abdusattorov (2766) ham o'z mahoratini namoyish etdi. 

Aytish joiz, Ruminiyadagi turnir hamyurtimiz uchun omadli kechmadi. Grossmeysterimiz 10 ishtirokchi orasida yakunda qo'shimcha ko'rsatkichlarga ko'ra 9-o'rin bilan kifoyalandi. Sakkizinchi pog'onadan joy olgan Uesli So (AQSH, 2757) ham hamyurtimiz singari 4 ochko jamg'ardi. Agar Nodirbek g'alaba qozonganida, kuchli beshlikdan joy olishi ham mumkin edi. 

Kecha o'tkazilgan so'nggi 9-turda Nodirbek qora donalarda turnirda ikkinchi raqam ostida saralangan Yan Nepomnyashhiy (FIDE, 2770)ga qarshi bahs olib bordi va yana durangga imzo chekdi. Abdusattorov 9 ta uchrashuvdan 8 tasida raqiblari bilan durang qayd etgani etiborga molik holat. SHaxmatchimizni birgina 2-turda Alireza Firuzdja (Franciya, 2737) mag'lub eta oldi. 

Turnirning birinchi raqamli ishtirokchisi Fabiano Karuana (AQSH, 2805) 9-turda biroz kutilmaganda niderlandiyalik Anish Giriga imkoniyatni boy berib qo'ydi. Uning eng yaqin taqibchilari durang o'ynashgani bois, yakunda to'rt nafar ishtirokchining ochkolari tenglashib qoldi. Bu holatda qoidaga muvofiq 5 tadan ochko jamg'argan ishtirokchilar o'rtasida tay-brek partiyalari o'tkazildi. Uchta uchrashuvning barchasida raqiblarini mag'lub etgan Fabiano Karuana turnir chempioniga aylandi. Amerikalik shaxmatchi kubok bilan birga 100 ming AQSH dollarini ham qo'lga kiritdi. 

Malumot uchun, "Superbet Chess Classic Romania" turnirining mukofot jamg'armasi 350 000 AQSH dollarini tashkil qildi. CHempion Karuana aytib o'tganimizdek, 100 000 dollarni qo'lga kiritdi. 

Turnir ishtirokchilari: Fabiano Karuana (AQSH, 2805), Yan Nepomnyashhiy (FIDE, 2770), Nodirbek Abdusattorov  (O'zbekiston, 2766), Dommaraju Gukesh (Hindiston, 2763), Uesli So (AQSH, 2757), Rameshbabu Pragnanandxa (Hindiston, 2747), Anish Giri (Niderlandiya, 2745), Alireza Firuzdja (Franciya, 2737), Maksim Vashe-Lagrav (Franciya, 2732), Bogdan-Danel Dyak (Ruminiya, 2680).