Farg'onadagi Olimpiya zaxiralari kollejida 4 milliard so'mdan ortiq pulni qimorga tikib yuborishdi

Prokuratura idoralari tomonidan sport sohasiga yo'naltirilgan byudjet mablag'larining maqsadli sarflanishi ahvoli tizimli ravishda o'rganib borilmoqda.

SHunday o'rganishlarning birida, Farg'ona viloyati Olimpiya zaxiralari kolleji bosh hisobchisining kirdikorlari fosh etildi. 

U egallab turgan lavozimdan g'araz maqsadlarda foydalanib, 2019-2021 yillar davomida o'ziga asossiz ravishda jami 4 mlrd. so'm ish haqi va ustama yozib olgan.

SHuningdek, kollej o'qituvilari nomiga bank plastik kartalari ochib, ularga 310 mln. so'm byudjet mablag'larini o'qituvchilarga bildirmasdan o'tkazib olgan. 

Bosh hisobchi talon-taroj qilgan jami 4,3 mlrd. so'm mablag'larni internet tarmog'i orqali qimor o'yinlariga tikib, sarf qilganligi aniqlangan.

Holat yuzasidan bosh hisobchi va boshqalarga nisbatan Jinoyat kodeksining 167 (O'zlashtirish yoki rastrata yo'li bilan talon-toroj qilish) va 209 (Mansab soxtakorligi) moddalari bilan jinoyat ishi qo'zg'atilgan. 

Gumonlanuvchiga nisbatan "qamoqqa olish" ehtiyot chorasi qo'llanilgan. Tergov davom etmoqda.