Fed Cup. Uchinchi bahsda ham mag'lubiyat, bu safar Indoneziya terma jamoasi tennischilarimizni sharmanda qildi

Osiyo/Okeaniya mintaqasidan o'rin olgan 1-guruh bahslarida omadsiz ishtirok etayotgan O'zbekiston ayollar terma jamoasi uchinchi uchrashuvda ham mag'lubiyat alamini totib ko'rdi. Bu bilan tennischilarimiz turnirga umuman tayyor emasliklarini amalda isbotlashdi. 

Qizlarimiz guruh bosqichining ketma-ket uchta uchrashuvida raqiblariga ochko ulashishdi. Bu safar Indoneziya terma jamoasi tennischilarimizni 3:0 hisobida taslim etdi. Nigina Abduraimova Madelin Priskaga 0:6, 4:6, Akgul Amanmuradova Aldila Sutjiadiga 6:3, 5:7, 4:6 hisobida yutqazdi. Hech narsani hal qilmaydigan juftlik bahsida esa Yasmina Karimjonova va Sitora Normurodovadan iborat tandem Tjen Janise hamda Madelin Priskaga 1:6, 3:6 hisobida engildi. 

Eslatib o'tamiz, O'zbekiston ayollar terma jamoasi avvaliga Janubiy Koreyadan 0:3, keyin esa Hindiston terma jamoasidan xuddi shu hisobdagi mag'lubiyatni qabul qilib olgan edi.