FIDE Jahon kubogi. SHamsiddin Sergey Karyakinga qarshi dona suradi (shaxmatchilarimizning 1/64 finaldagi raqiblari)

Dunyoning eng kuchli shaxmatchisi Magnus Karlsen ham ishtirok etayotgan musobaqaning umumiy mukofot jamg'armasi 1 892 500 dollarni tashkil qiladi. G'olib yakunda 110 000 dollarga ega bo'ladi. Birinchi bosqich - 1/128 finalda 156 nafar ishtirokchi bahslarga kirishdi. Ikkinchi bosqich - 1/64 finaldan esa reytingi yuqori bo'lgan 50 grossmeyster kurashga qo'shiladi. 

Xabar berganimizdek, Jahongir Vohidov, SHamsiddin Vohidov, Nodirbek Yoqubboev, Javohir Sindarov va Nodirbek Abdusattorovdan iborat O'zbekiston erkaklar terma jamoasining bari ilk bosqichda (2 partiya) umumiy g'alabaga erishib, 1/64 finalga yo'l olishgandi. 

Etiborga molik jihati, aynan 1/64 final bosqichida o'tgan yili grossmeyster unvonini olgan 19 yoshli shaxmatchimiz SHamsiddin Vohidov dunyo tarixidagi ikkinchi yosh grossmeyter, 2015 yilgi FIDE Jahon Kubogi g'olibi, tezkor shaxmat bo'yicha jahon chempioni (2012 yil), blic bo'yicha jahon chempioni (2016) 2013 va 2019 yillarda jamoaviy jahon chempionatida ikki bor chempionlik tojini kiygan rossiyalik Sergey Karyakinga qarshi dona suradigan bo'ldi. Karyakin to'g'ridan-to'g'ri 1/64 finaldan bahslarga kirishsa, SHamsiddin 1/128 finalda gruziyalik Luka Paychadzeni 2:0 hisobida mag'lubiyatga uchratgandi.   

FIDE Jahon Kubogi. 1/64 final bosqichi

Jahongir Vohidov – Lener Perez Dominges (AQSH) 

Javohir Sindarov – Alireza Firuzja (Franciya)

Nodirbek Yoqubboev – David Navara (CHexiya)

Nodirbek Abdusattorov – Aravindx CHitambaram (Hindiston)

SHamsiddin Vohidov – Sergey Karyakin (Rossiya)

Malumot uchun, 1/64 final bosqich bahslari 15-17 iyul kunlari bo'lib o'tadi. Bugun g'olibi aniqlanmay qolgan 1/128 final bosqich juftliklarida qo'shimcha tay-brek o'ynaladi.