FIDE Jahon kubogi. Yigitlarimiz to'liq tarkibda 1/64 finalga chiqishdi

Dunyoning eng kuchli shaxmatchisi Magnus Karlsen ham ishtirok etayotgan musobaqaning umumiy mukofot jamg'armasi 1 892 500 dollarni tashkil qiladi. G'olib yakunda 110 000 dollarga ega bo'ladi. Birinchi bosqich - 1/128 finalda 156 nafar ishtirokchi bahslarga kirishdi. Ikkinchi bosqich - 1/64 finaldan esa reytingi yuqori bo'lgan 50 grossmeyster kurashga qo'shiladi. 

Quvonarlisi, Jahongir Vohidov, SHamsiddin Vohidov, Nodirbek Yoqubboev, Javohir Sindarov va Nodirbek Abdusattorovdan iborat O'zbekiston erkaklar terma jamoasining bari ilk bosqichda (2 partiya) umumiy g'alabaga erishib, 1/64 finalga yo'l olishdi. 

Dunyo tarixidagi ikkinchi yosh grossmeyter maqomini olgan Nodirbek Abdusattorov indoneziyalik raqibi Muhammad Ervan Sochiga kelmagani bois, kurashsiz ikkinchi bosqichga yo'llanmani qo'lga kiritdi. O'smirlar o'rtasida jahon chempioni Javohir Sindarov AQSH vakili Tang Endryuni 1,5:0,5, Jahongir Vohidov gruziyalik Levan Pantsulayani 1,5:0,5, Nodirbek Yoqubboev kanadalik Razvan Preotuni 1,5:0,5, SHamsiddin Vohidov gruziyalik Luka Paychadzeni 2:0 hisobida mag'lubiyatga uchratdi.   

Musobaqa reglamentiga ko'ra, shaxmatchilar har bir bosqichda ikkitadan uchrashuv o'tkazishadi. Durang bo'lib qolgan taqdirda qo'shimcha uchinchi partiya -tay-brekka murojaat qilinadi. Unda ham tomonlar murosaga kelishsa, u holda vaqt chegarasiga asoslangan tezkor shaxmatda g'olib aniqlanadi.