Germaniya terma jamoasida ishlayotgan hamyurtimiz bilan onlayn seminar o'tkazildi

Mazkur seminarda Respublikamizda faoliyat yuritayotgan trener hamda sportchilar, shu bilan bir qatorda O'zbekiston Milliy Olimpiya qo'mitasi, Jismoniy tarbiya va sport vazirligidan vakillar ishtirok etishdi.

Butuzova Natalya Anatolevna asli O'zbekistoning Buxoro viloyatidan bo'lib, 1980 yil Moskvada bo'lib o'tgan Olimpiya o'yinlarining sovrindoridir. Uni O'zbekistonda kamondan otish sport turini rivojlanishida o'z hissasini qo'shgan mutaxassis sifatida yaxshi bilamiz. Hozirgi kunda Germaniya Federativ Respublikasida faoliyatini davom ettirib, ayollar terma jamoasiga murabbiylik qilib kelmoqda.

Kirish so'zida mutaxassis O'zbekistonda kamondan otish sport turiga sezilarli etibor qaratilayotganidan mamnun bo'lib, rahbar mutasaddilarga o'z tashakkurini izhor etdi. Seminarda Butuzova o'z tajribasidan kelib chiqqan holda merganlarga foydali maslahatlari bilan o'rtoqlashdi. Kamondan otish sport turida eng kerakli bo'lgan jihatlar sportchi o'zini qanday tutishi, texnik yondashuv, psixologiya haqida gapirib berdi.

“Sportchi qachon yaxshi natijalarga erishadi? Qachonki, ko'proq o'quv-mashg'ulot yig'inlar, xalqaro musobaqalarda tajriba orttirsa. Mergan doim o'zini psixologik tayyorlab borishi, raqibni engishiga ishonishi kerak. Doim olg'a harakat qilish lozim. Asosiysi, ko'proq xalqaro musobaqalarda qatnashish”, – dedi hamyurtimiz.

Mutaxassis so'zida davom etar ekan, sportchilar murabbiyni qunt bilan eshitib, yuqori natijalarga erishishlari uchun ko'rsatmalarga amal qilishlari lozimligi haqida gapirdi. ZOOM platformasi orqali bo'lib o'tgan seminar davomida qatnashchilar o'zlarini qiziqtirgan savollarga javoblar oldilar. Seminar so'ngida mutaxassis barchaga o'z tashakkurini bildirib, kelajakda barcha sportchilarga omad tiladi.