Germaniyada o'tkazilgan musobaqada o'zbek chavandozi ikkinchi natijani qayd etdi

Ushbu musobaqada ishtirok etgan hamyurtimiz Bekzod Qurbonov yurtimiz sharafini munosib himoya qilib, sovrindorlar qatoridan joy oldi. Bu haqda MOQ Matbuot xizmati xabar tarqatdi.

Bahslar yakuniga ko'ra balandligi 135 sm bo'lgan to'siqlardan o'tish bellashuvlarida Bekzod 60 nafar sportchisi orasida musobaqaning kumush medaliga sazovor bo'ldi. 70 nafar ishtirokchi bahs olib borgan balandligi 140 sm.ni tashkil etgan yo'nalishda esa sportchimiz bronza medali bilan taqdirlandi.

Eslatib o'tamiz, Bekzod Qurbonov Las-Vegas (AQSH)da bo'lib o'tishi kerak bo'lgan “FEI World Cup 2020” musobaqasining final bosqichiga yo'llanma olgan. Vakilimiz mazkur nufuzli musobaqaga tayyorgarlik ko'rish uchun Germaniyaga yo'l olgan, biroq koronavirus sababli chavandozimiz Evropa arenalarida o'z ishtiroklarini vaqtinchalik to'xtatgan edi. Hozirgi kunga kelib, musobaqalarning qayta boshlaganligi tufayli Qurbonov yurtimiz sharafini himoya qilishda davom etmoqda.