Grand Prix Upper Austria turnirida 3 ta medal qo'lga kiritdik, bu safar ham yoshlar o'zlarini ko'rsatishdi

Uch kun davomida dunyoning 52 mamlakatidan kelgan dzyudochilar medallar hamda jahon reytingi uchun beriladigan qimmatli ochkolar uchun bahs olib borishdi. Yakunda Yaponiya terma jamoasi medallar jamg'arish bo'yicha birinchi o'rinni egalladi. Dzyudo vatani vakillari 2 ta oltin, 4 ta kumush, 6 ta bronza medali bilan umumjamoa hisobida birinchi bo'lishdi. 

Peshqadam singari 2 ta oltin medal qo'lga kiritgan Gruziya terma jamoasi kumush medallar kamligi hisobigagina ikkinchi o'rindan joy olishdi. Kuchli uchlikka safida ikki chempionga ega Italiya terma jamoasi yakun yasadi. Sloveniya, Franciya, Germaniya, Braziliya, Ukraina, Kuba, Qozog'iston va Avstraliya terma jamoalari tarkibida ham bir nafardan oltin medal sohibi borligini inobatga olsak, turnir qay darajada murosasiz kechganligi oydinlashadi.      

O'zbekiston terma jamoasi esa Avstriya Gran-prisida 1 ta kumush, 2 ta bronza medaliga ega chiqdi. Toshkent "Katta Dubulg'a" turnirida bo'lgani singari Lincda ham yosh dzyudochilarimiz o'zlarini ko'rsatishdi. 18 yoshli Laziza Haydarova hamda 20 yashar Mardon Ravshanov bronza medalini qo'lga kiritishdi. Bu ularning kattalar o'rtasidagi musobaqalardagi birinchi medali edi. Murodjon Yo'ldoshev esa o'zi uchun yangi -81 kg vaznda kumush medal bilan taqdirlandi.