Grand Swiss. 15 yoshli xalqaro grossmeysterimiz Qosimjonovni ortda qoldirdi

Mukofot jamg'armasi 433 000 AQSH dollarini tashkil etuvchi Grand Swiss turnirida O'zbekiston sharafini 17-jahon chempioni Rustam Qosimjonov hamda 15 yoshli xalqaro grossmeysterimiz Nodirbek Abdusattarov himoya qilmoqda. Qosimjonov 2657, Abdusattarov esa 2608 reyting ochkosiga ega. 

Musobaqada muvaffaqiyatli dona surayotgan istedodli shaxmatchimiz, 15 yoshli xalqaro grossmeyster Nodirbek Abdusattorov 10-turda rossiyalik xalqaro grossmeyster Grigoriy Oparin (2654)ga qarshi qora donalarda bahs olib bordi va kuchli raqib bilan durangga erishdi. 

O'n imkoniyatdan 5,5 ochko jamg'argan Nodirbek qo'shimcha ko'rsatkichlarga ko'ra 43-o'rinni egallab turibdi. Bu borada u Rustam Qosimjonovdan o'tib ketdi. Musobaqada 106-raqam ostida tasniflangan shaxmatchimiz uchun bu yomon natija emas. Bugun so'nggi 11-turda hamyurtimiz oq donalarda rossiyalik grossmeyster Aleksey Sarana (2655)ga qarshi bahs olib boradi.