Grand Swiss. Nihoyat, Rustam Qosimjonov g'alaba qozondi va chempionlik poygasiga qo'shildi

Mukofot jamg'armasi 433 000 AQSH dollarini tashkil etuvchi Grand Swiss turnirida O'zbekiston sharafini 17-jahon chempioni Rustam Qosimjonov hamda 15 yoshli xalqaro grossmeysterimiz Nodirbek Abdusattarov himoya qilmoqda. Qosimjonov 2657, Abdusattarov esa 2608 reyting ochkosiga ega. 

Kecha o'tkazilgan 8-partiyada Rustam Qosimjonov nihoyat g'alaba qozonishga muvaffaq bo'ldi. Hamyurtimiz qora donalarda harakat qilganiga qaramay, o'zi singari 4 ochko jamg'arib turgan hindistonlik xalqaro grossmeyster Puranik Abximanyuni mag'lubiyatga uchratdi. 

Ushbu muhim g'alabadan so'ng Qosimjonov o'z ochkolarini 5 taga etkazib oldi va chempionlik poygasiga qo'shildi. U turnir jadvalida qo'shimcha ko'rsatkichlarga ko'ra 32-pog'onadan 17-o'ringa ko'tarilib oldi. Rustam Qosimjonov bugun o'tkaziladigan 9-turda oq donalarda britaniyalik grossmeyster Devid Xouelga qarshi bahs olib boradi. 

Malumot uchun, 22 oktyabr kuni yakuniga etadigan Grand Swiss turniri g'olibi 70 000, ikkinchi o'rin sohibi 50 000, uchinchi o'rin egasi esa 40 000 AQSH dollari miqdoridagi mukofot puliga ega bo'ladi. Kuchli o'ttizlikka kira olgan shaxmatchiga esa 2000 AQSH dollari taqdim etiladi.