Grand Swiss. Rustam Qosimjonov durang, Abdusattorov g'alaba bilan boshladi

Musobaqada amaldagi jahon chempioni norvegiyalik Magnus Karlsen, jahon vice-chempionlari Vishvanatan Anand (Hindiston), Fabion Karuana  (AQSH), Sergey Karyakin (Rossiya) kabi mashhur shaxmatchilar dona surishyapti. 

Mukofot jamg'armasi 433 000 AQSH dollarini tashkil etuvchi Grand Swiss turnirida O'zbekiston sharafini 17-jahon chempioni Rustam Qosimjonov hamda yosh xalqaro grossmeysterimiz Nodirbek Abdusattarov himoya qilmoqda. Qosimjonov 2657, Abdusattarov esa 2608 reyting ochkosiga ega. 

Rustam Qosimjonov birinchi turda isroillik xalqaro master Ariel Erenergga qarshi qora donalarda harakat qilib, murosaga keldi. Nodirbek esa qora donalarda o'ynashiga qaramay, reytingda o'zidan yuqorida turgan angliyalik xalqaro grossmeyster Gavayn Jons (2688)ni mag'lubiyatga uchratdi. 

Bugun 2-turda Rustam Qosimjonov oq donalarda xitoylik Ting Jie Ley (2469)ga, Nodirbek Abdusattorov esa rossiyalik xalqaro grossmeyster Anton Demchenko (2655)ga qarshi dona suradi.    

Malumot uchun, 22 oktyabr kuni yakuniga etadigan Grand Swiss turniri g'olibi 70 000, ikkinchi o'rin sohibi 50 000, uchinchi o'rin egasi esa 40 000 AQSH dollari miqdoridagi mukofot puliga ega bo'ladi. Kuchli o'ttizlikka kira olgan shaxmatchiga esa 2000 AQSH dollari taqdim etiladi.