Grand Swiss. Rustam Qosimjonovda g'alaba, 15 yoshli grossmeysterimizda durang!

Musobaqada amaldagi jahon chempioni norvegiyalik Magnus Karlsen, jahon vice-chempionlari Vishvanatan Anand (Hindiston), Fabion Karuana  (AQSH), Sergey Karyakin (Rossiya) kabi mashhur shaxmatchilar dona surishyapti. 

Mukofot jamg'armasi 433 000 AQSH dollarini tashkil etuvchi Grand Swiss turnirida O'zbekiston sharafini 17-jahon chempioni Rustam Qosimjonov hamda 15 yoshli xalqaro grossmeysterimiz Nodirbek Abdusattarov himoya qilmoqda. Qosimjonov 2657, Abdusattarov esa 2608 reyting ochkosiga ega. 

Rustam Qosimjonov ikkinchi turda oq donalarda xitoylik Ting Jie Ley (2469)ga qarshi bahs olib bordi va 27-yurishdan so'ng raqibini mag'lubiyatga uchratdi. Nodirbek Abdusattorov esa rossiyalik xalqaro grossmeyster Anton Demchenko (2655) bilan murosaga keldi. Birinchi turda aksincha Qosimjonov durang o'ynagan, Abdusattorov g'alabaga erishgandi. 

Malumot uchun, 22 oktyabr kuni yakuniga etadigan Grand Swiss turniri g'olibi 70 000, ikkinchi o'rin sohibi 50 000, uchinchi o'rin egasi esa 40 000 AQSH dollari miqdoridagi mukofot puliga ega bo'ladi. Kuchli o'ttizlikka kira olgan shaxmatchiga esa 2000 AQSH dollari taqdim etiladi.