Grand Swiss. Rustam Qosimjonovda ketma-ket ikkinchi mag'lubiyat

Mukofot jamg'armasi 433 000 AQSH dollarini tashkil etuvchi Grand Swiss turnirida O'zbekiston sharafini 17-jahon chempioni Rustam Qosimjonov hamda 15 yoshli xalqaro grossmeysterimiz Nodirbek Abdusattarov himoya qilmoqda. Qosimjonov 2657, Abdusattarov esa 2608 reyting ochkosiga ega. 

Kecha o'tkazilgan 10-partiyada Rustam Qosimjonov qora donalarda o'ynab, kutilmaganda mag'lubiyat alamini totib ko'rdi. Hamyurtimiz ruminiyalik grossmeyster Bogdan-Daniel Dik (2613)ga imkoniyatn boy berdi. Bu 17-jahon chempionining ketma-ket qabul qilib olgan ikkinchi mag'lubiyati bo'ldi. 

Bugun o'tkaziladigan 11-tur oldidan Qosimjonov 5 ochko bilan turnir jadvalida qo'shimcha ko'rsatkichlarga ko'ra 73-o'rinni egallab turibdi. Bir tur oldin u 37-pog'onadan joy olgandi. Rustam Qosimjonov bugun o'tkaziladigan so'nggi 11-turda oq donalarda gollandiyalik Erin L`ami (2619)ga qarshi harakat qiladi.

Malumot uchun, 22 oktyabr kuni yakuniga etadigan Grand Swiss turniri g'olibi 70 000, ikkinchi o'rin sohibi 50 000, uchinchi o'rin egasi esa 40 000 AQSH dollari miqdoridagi mukofot puliga ega bo'ladi. Kuchli o'ttizlikka kira olgan shaxmatchiga esa 2000 AQSH dollari taqdim etiladi.