Grunt qiroli Rafael Nadalni tabriklaymiz!

Rafael Nadal Parera 1986 yil 3 iyun kuni Ispaniyaning Malorka oroli Manakor shahrida dunyoga kelgan. Grunt, yani tuproq qoplamali kortlar qiroli nomini olgan Nadal bugun 34 yoshga to'ldi. Rafaning otasi Sebastyan ikki ukasi bilan restoran hamda oyna ishlab chiqariz biznesi bilan shug'ullanadi. Onasi Ana Mariya. Tennischining singlisi Mariya Izabel.

Rafael tennis bilan shug'ullanishni amakasi Tonining murabbiyligida 4 yoshidan boshlagan. Bu tandem 2019 yilga kelibgina hamkorlikni to'xtatadi. Nadal professional faoliyatini 2001 yilda boshlagan va shu kungacha 85 ta turnirda bosh mukofotni qo'lga kiritgan. Faoliyati davomidagi ishtirokidan $120,955,904 ishlab olgan (tennis tarixidagi uchinchi ko'rsatkich). 

Ispaniyalik afsona "Katta Dubulg'a" turkumiga kiruvchi 19 ta turnirda bosh sovringa ega chiqqan. Bu boradagi birinchi tituli "Rolan Garros" bo'lib, 2005 yilda qo'lga kiritgan. Ilk bor 2008 yilning avgust oyida dunyoning birinchi raketkasiga aylangan. 

Nadal 35 ta "Masters" turnirlarida zafar quchgan. Bu tennis tarixidagi rekord natija hisoblanadi. 2008 yilda Pekin Olimpiadasida chempion bo'lgan. 2016 yilgi Rio Olimpiadasining juftlik bahslarida ham oltin medal bilan taqdirlangan.  

Ispaniya terma jamoasi tarkibida besh bor - 2004, 2008, 2009, 2011 va 2019 yillarda norasmiy jahon chempionati hisoblangan Devis Kubogini boshi uzra baland ko'targan. Uning nomidagi akademiya 2015 yilning dekabrida tashkil etilgan bo'lib, ona shahri Manakorda faoliyat yurityapti. Nadal bo'sh vaqtida golf va poker o'ynaydi. Madridning "Real" klubi muxlisi. Turmush o'rtog'i Mariya Fransiska "Xiska" Parelo bilan 2005 yilda tanishgan. 2019 yilning oktyabriga kelibgina ular rasman nikohdan o'tishgan.