Gulnoza Matniyozova sportga qiziqish sababi, chempionlik siri va boshqalar haqida

Milliy olimpiya qo'mitasi Matbuot va Media departamenti ushbu nufuzli musobaqada ishtirok etuvchi etakchi sportchilarimiz bilan qisqa intervyular tashkil qilib kelmoqda. Bugun savollarimizga o'zbek ayollari ichida dzyudo bo'yicha jahon turnelarida birinchi oltin medalni qo'lga kiritgan sportchi Gulnoza Matniyozova javob qaytaradi.

Sportga qiziqish sababi

Taxminan besh yoshimda ota-onam bilan birga televizor ko'rib o'tirardik. O'shanda mamlakatimizning birinchi prezidenti yosh kurashchilarni medallar bilan taqdirladilar. SHunda men ham qiziqib dadamdan so'ragandim: "Men ham sportchi bo'lsam prezidentimiz medal beradilarmi?". SHu tariqa sportga qiziqib, mashg'ulotlarda qatnasha boshlaganman. Yakkakurashchi bo'lganim bilan, sportning gimnastika va futbol turlarini ham juda yaxshi ko'raman.


Ovqat tanlamaydi

Ovqatlanish tartibim haqida gapiradigan bo'lsam, hamma kabi taomlar istemol qilaman. Ovqat tanlab o'tirmayman. Ertalab ko'p ham nonushta qilmayman.


CHempionlik siri

Buning uchun har bir sportchi o'z oldiga maqsad qo'yishi lozim. Mehnat qilib, o'z ustida muntazam ravishda ishlash kerak. Murabbiy ko'rsatmalarini doimo bajarishi shart. Ana shunda u o'z maqsadiga erishadi va shohsupaning eng yuqori pog'onasidan o'rin oladi.


Osiyo o'yinlari oldidan

Indoneziyadagi musobaqaga jiddiy ravishda tayyorgarlik ko'rdik. Hozircha bu borada aniq bir gap ayta olmayman. Ammo, sovrindorlar qatoridan o'rin olish uchun jiddiy ravishda harakat qilaman. Osiyo o'yinlarida jamoadoshlarimga ham omad tilayman.