Gulruhbegim Jahon kubogi yo'lidagi asosiy raqibasini engdi

Ayollar o'rtasida o'tkazilayotgan musobaqaning uchinchi turida xalqaro grossmeysterimiz Gulruhbegim Tohirjonova muhim g'alabaga erishdi. Turnir reytingida birinchi raqam ostida tasniflangan Tohirjonova qora donalarda harakat qilishiga qaramay, o'zi singari ikki g'alabaga erishgan qozog'istonlik Madina Davletbaevani mag'lubiyatga uchratdi. 

Hamyurtimiz Nilufar Yoqubboeva qozog'istonlik Bibisara Assaubaevadan ustun keldi. Grossmeysterimiz Sarvinoz Qurbonboeva yana bir qozog'istonlik shaxmatchi Gulisxan Naxbaeva bilan durangga imzo chekdi. Bahora Abdusattorova qozoq shaxmatchisi Meruert Kamalidenovani engdi. 

Bugun o'tkaziladigan to'rtinchi tur oldidan Tohirjonova 3 ochko bilan yakka peshqadam bo'lib turibdi. Nilufar Yoqubboeva 2,5 ochko bilan ikkinchi o'rinni band etgan. Keyingi pog'onalardan joy olgan shaxmatchilar hisobida ikki va undan kamroq ochko bor. Bugun to'rtinchi turda o'zbek derbisi bo'lib o'tadi. Gulruhbegim oq donalarda Yoqubboevaga qarshi bahs olib boradi.