Gulruhbegim Xitoydagi kuchlilar turnirida qanday ishtirok etyapti?

Umumiy sovrin jamg'armasi 119 000 AQSH dollarini tashkil etuvchi Belt & Road China 2019 musobaqasida sayyoramizning kuchli shaxmat qirolichalari o'z mahoratlarini namoyish etyapti. Ular orasida grossmeysterimiz Gulruhbegim Tohirjonova ham dona surmoqda. 

Tohirjonova bugungacha o'tkazilgan ettita turda 3,5 ochko jamg'ardi. U 7-turda hindistonlik mashhur shaxmatchi Xarika Dronovalliga qarshi qora donalarda harakat qilib, mag'lubiyatga uchradi. Gulruhbegim ayni daqiqalarda 8-turda eronlik Sarasadat Xademalsharexga qarshi qora donalarda harakat qilyapti. 

Xitoydagi xalqaro turnirda rossiyaliklar Aleksandra Kostenyuk, Olga Girya, hindistonlik Xarika Dronovalli, gruziyaliklar Nino Batsiashvili, Nana Dzagnidze, bolgariyalik Antoaneta Stefanova, ukrainalik Anna Ushenina singari mashhur grossmeysterlar dona surishyapti. 

Malumot uchun, musobaqa g'olibi 40 000 dollarni qo'lga kiritadi. Ikkinchi o'ringa 20 000, uchinchi o'ringa 15 000 AQSH dollari miqdoridagi mukofot puli kafolatlangan.