Hamyurtlarimizning 4 nafarida g'alaba, Afruza medal olishga yaqin

8, 10 hamda 12 yoshli shaxmatchilar o'rtasida tashkil etilayotgan jahon chempionatida dunyoning 100ga yaqin mamlakatidan istedodli shaxmatchilar ishtirok etyapti.

Etiborlisi, jahon chempionatida qatnashayotgan olti shaxmatchimizdan to'rt nafari bu turda g'alaba nashidasini surdi. Sakkiz yoshlilar musobaqasida o'z imkoniyatini sinab ko'rayotgan Humoyun Bekmurodov 10-turda qozog'istonlik Amir Kalievni mag'lubiyatga uchratib, ochkolarini 6taga etkazib oldi.

O'n yoshli shaxmatchilar bahsida birinchi raqam ostida tasniflangan Islombek Sindorov esa AQSH vakili Adrian Kondakovni enga olmadi. Uchrashuv durang natija bilan yakunlandi.

O'n ikki yoshli shaxmatchilar musobaqasida ikkinchi tartib raqamli ishtirokchi bo'lib turgan Javohir Sindorov esa ukrainalik Vladislav Larkindan ustun keldi. Javohirning ochkolari 7taga etdi.

Jahon chempionati kashfiyotiga aylangan Afruza Hamdamova bu turda yana g'alaba nashidasini surdi. U qora donalarda o'ynashiga qaramay, reytingda o'zidan ancha yuqorida turgan ozarboyjonlik shaxmatchi Leyla Budangovani mag'lub etdi.

Afruza so'nggi tur oldidan 7,5 ochko bilan uchinchi o'rinni egallab turibdi. Bugun u 8,5 ochko bilan birinchi pog'onadan joy olgan qozog'istonlik Aysha Zakirovaga qarshi dona suradi. Agar g'alaba qozonsa, sovrinli o'rinlardan birini aniq qo'lga kiritadi.  

Hamyurtlarimizdan Yuliya Xegay armanistonlik Astgik Xakopyanga yutqazib qo'ydi. Maftuna Bobomurodova esa aksincha qora donalarda harakat qilib, AQSH vakilasi Nura Baalladan ustun ekanligini amalda isbotladi.