Haqiqiy sensaciya! Quvayt Armanistonni mag'lub etib, O'zbekistonga katta yordam berdi. Xokkeychilarimiz bugun navbatdagi o'yinida muzga chiqadi

Kun davomida O'zbekiston milliy terma jamoasi eronlik xokkeychilarga qarshi muzga chiqib, 20:0 hisobida g'alaba qozondi. Ikkinchi bellashuvda indoneziyaliklar Malayziya termasidan 7:4 hisobida ustun keldi.

Musobaqa mezboni bo'lmish Armaniston esa Quvaytga qarshi bahs olib bordi va kutilmaganda overtaymda 4:5 hisobida imkoniyatni boy berib qo'ydi.

Bu orqali O'zbekiston terma jamoasi 7 ochko bilan divizion peshqadamiga aylanib oldi. Armaniston esa ikkinchi o'ringa tushdi. Oldinda har bir terma jamoani ikkitadan o'yin kutib turibdi. Vakillarimiz III B divizioniga yo'l olishi uchun mazkur o'yinlarning barchasida asosiy vaqtda g'alaba qozonishlari talab etiladi.

Bugun xokkeychilarimiz to'rtinchi tur doirasida Indoneziya jamoasiga qarshi muzga chiqadi. O'yin Toshkent vaqti bilan 15:00 da boshlanadi. Armaniston esa bu safar Eron bilan to'qnash keladi.