"Humo" o'z uyida "Torpedo"ga imkoniyatni boy berib qo'ydi, "Tashkent Select"da esa g'alaba

Qozog'iston chempionatida ishtirok etayotgan Toshkentning "Humo" xokkey klubi kecha o'z uyida Ust-Kamenogorsk shahrining "Torpedo" jamoasini qabul qildi.

O'yinning asosiy vaqti hamda overtaymda hisob 2:2 ko'rinishida bo'ldi. Bullitlar seriyasida esa omad qozog'istonliklarga kulib boqdi — 2:3.

Mazkur o'yindan keyin "Humo"ning ochkolari soni 24 tani tashkil etmoqda, "qanotlilar" turnir jadvalida beshinchi o'rinni egallab turibdi. Musobaqa peshqadami bo'lib turgan "Torpedo" hisobida esa 33 ochko mavjud. Bugun jamoalar o'rtasidagi ikkinchi o'yin tashkil etiladi.

Bundan tashqari, kecha Qozog'iston yoshlar chempionatida ishtirok etayotgan "Tashkent Select" jamoasi Atirauning "Jas Batir" klubi mehmoni bo'ldi va overtaymda 4:3 hisobida g'alabani ilib ketdi.

Bir kun oldin o'tkazilgan ilk o'yinda qozog'istonlik yosh xokkeychilar 14:3 hisobida zafar quchgan edi.

G'alabadan keyin toshkentliklarning ochkolari soni 8 taga etdi. Ular turnir jadvalida 11-o'rinda bormoqda.