Humoyun Sultonov President's Cup finalida!

Mukofot jamg'armasi 40 ming AQSH dollarini tashkil etuvchi musobaqada ikkinchi raketkamiz Humoyun Sultonov ham muvaffaqiyatli odimlayapti. Dunyoning 550-raketkasi bo'lib turgan Sultonov biroz avval yakuniga etgan 1/2 final uchrashuvida ortiqcha qiyinchiliksiz g'alabaga erishdi. 

Hamyurtimiz 75 daqiqa davom etgan bahsda rossiyalik Evgeniy Karlovskiyni 6/3, 6/1 hisobida mag'lubiyatga uchratdi. Bu bilan Sultonov tennischilarning o'zaro uchrashuvlaridagi hisob muvozanatini ham tikladi - 1:1. Karlovskiy 3, Sultonov 9 ta eys zarbani amalga oshirdi. Humoyun qo'shxatoga yo'l qo'ymadi va aksincha 4 ta breykka erishdi. 

Humoyun Sultonovning finaldagi raqibi ayni daqiqalarda o'tkazilayotgan qozog'istonlik Denis Evseev hamda turkiyalik Yanki Erel o'rtasidagi uchrashuvdan so'ng malum bo'ladi. Birinchi setning oltinchi geymidan so'ng (3/3) ushbu bahs yomg'ir sabab to'xtatildi.