Ikki shaxmatchimiz Jahon chempioni bo'ldi, yana ikkisi vice-chempion!

Musobaqa 8,10 hamda 12 yoshgacha bo'lgan o'smir va qizlar o'rtasida tashkil etildi. Jahon chempionatida Sevara Boymurodova boshchiligidagi jami 14 nafar yosh shaxmatchilarimiz yurtimiz sharafini himoya qilishdi. Tezkor shaxmat bo'yicha ikkinchi FIDE jahon chempionati yosh aql idrok sohiblarimiz uchun omadli keldi. 

Hamyurtlarimizdan 3 nafari jahon chempionati yakunida g'olib va sovrindorlar safidan joy olishdi. Humoyun Bekmurodov 8 yoshilar bahsida, Umida Omonova 12 yoshli qizlar musobaqasida zafar quchib, jahon chempioniga aylanishdi. 

FIDE ustaligiga nomzod Humoyun ketma-ket 8ta partiyada g'alaba qozondi, so'nggi 9-turda durang qayd etib, yakunda 8,5 ochko jamg'arishga muvaffaq bo'ldi. Rossiyalik Aleksandr Usov 8 ochko bilan kumush, yana bir rus shaxmatchisi Platon Krasnopetov esa bronza medaliga sazovor bo'ldi. 

Umida Omonova (1631) ham katta ustunlik bilan jahon chempioni bo'ldi. Vakilamiz 6ta g'alaba va 3ta durang natija qayd etib, 7,5 ochko bilan rapid yo'nalishida chempionlik shoxsupasiga ko'tarildi. Kuchli uchlikdan 7tadan ochko to'plagan rossiyalik shaxmatchi qizlar Veronika SHubenkova (1463) va Mariya Alekseenko (1589) yakun yasashdi. 

FIDE ustaligiga nomzod Afruza Hamdamova 10 yoshli shaxmatchilar musobaqasining rapid yo'nalishida kumush medalni qo'lga kiritdi. Olmos Rahmatullaev esa 12 yoshli o'g'il bolalar turnirida jahon vice-chempioniga aylandi.