Ikkinchi jahon urushi qatnashchilari orasida yunon-rim kurashchimiz Hamid Vohidov ham bor

Hamid aka butun hayoti va faoliyatini O'zbekistonda yunon-rim kurashining ommalashishiga sarfladi. U qiyinchiliklarga to'la suronli yillarni shunday eslagan edi: 

“Biz qiyin davrni boshdan kechirdik. Mashg'ulotlar mat, yani kurash gilamida emas, balki matraslar ustida o'tkazilardi. Buxoroda esa vaziyat bundan ham ayanchli ahvolda edi. Kurash maydonida erdan 30 santimetr chuqurlikda bo'lib, ichiga opilka, yani taxta qirindisi to'shalgandi”.

Hamid Vohidov Buxoro shahrida dunyoga kelgan. 1942 yilda 10-sinfni tamomlagan bo'lajak kurashchimiz xarbiy xizmatga chaqarildi va Vatan himoyasi uchun olovli kurash maydoni – Stalingrad frontiga jo'nab ketdi. Vohidov Stalingraddan to Berlingacha bo'lgan masofani g'olibona bosib o'tdi. 

1945 yilda ikkinchi jahon urushi yakunlangach, Hamid Vohidov o'zi tug'ilib o'sgan Buxoroga qaytdi va yunon-rim kurashi to'garagini ochdi. 1947 yilda avvaliga Buxoro shahri, keyin esa O'zbekiston chempioni bo'ldi. 

U 1950 yili yana xarbiy xizmatga chaqirildi. Xizmat davomida Turkiston xarbiy okrugi (TurkVO) chempioniga aylandi. 1955 yilda esa sobiq Ittifoq Armiyasi chempioni bo'ldi va bu bilan unga leytenant unvoni berildi. 1956 yili SSSR xalqlari Spartakiadasida 5-o'rinni egalladi. Bu natija unga SSSR sport ustasi unvonining berilishiga xizmat qildi. Hamid Vohidov sportchilik faoliyati davomida 13 karra O'zbekiston chempioni bo'ldi. 

Murabbiylik faoliyatida 30 nafardan ziyod sport ustalarini tayyorladi. Uning mehnatlari munosib taqdirlanib, qahramonimizga O'zbekiston Respublikasida xizmat ko'rsatgan murabbiy unvoni berildi. Hamid aka 1998 yil faxriylar o'rtasida o'tkazilgan jahon chempionatida ishtirok etib, yunon-rim kurashi bahslarida kumush medalni qo'lga kiritdi.

Biz Hamid Vohidov misolida Ikkinchi jahon urushida qatnashgan, bugungi dorulomon kunlarimiz sababchisi bo'lganlar uchun boshimiz erga tekkuncha tazim qilamiz.