Ilmiy tadqiqotlar bo'yicha xorijiy tajribalar o'rganilmoqda

Ayni kunlarda O'zbekiston davlat jismoniy tarbiya va sport universiteti rektori Mahmudjon Boltabaev hamda Jismoniy tarbiya va sport ilmiy tadqiqotlari instituti direktori Rashid Matkarimov Latviya va Litva davlatlarida sport talim tizimi hamda ilmiy tadqiqot muassasalari bo'yicha tajriba almashish maqsadida xizmat safarida bo'lib turishibdi.

Yurtimiz vakillari tashrif doirasida Riga shahrida joylashgan Latviya sport talimi akademiyasi rahbariyati bilan uchrashishdi. Unda o'zaro hamkorlik masalalari muhokama qilinib, ilmiy tadqiqot faoliyatini rivojlantirish, yosh olimlarni o'zaro tajriba almashish tizimini yo'lga qo'yish bo'yicha kelishuvga erishildi hamda ikki tomonlama hamkorlik bitimi imzolandi.

Universitetimiz delegaciyasi Litva sport universiteti tarkibidagi Sport va innovaciyalar tadqiqot institutida ham bo'ldi. U erdagi sportchilar o'quv-mashg'ulot yig'inlarida foydalaniladigan mobil laboratoriyalar, atletlarning sakrash kuchini o'lchab beradigan “BTS bioengineering” hamda zamonaviy “biomech” apparatlari vakillarimizda katta qiziqish uyg'otdi.

Laboratoriya xodimlari tomonidan zamonaviy texnika vositalarini qanday ishlatilishi, kunlik meyorlari haqida tushuncha berildi. Uchrashuv so'ngida Litva Sport va innovaciyalar tadqiqot instituti bilan hamkorlikda faoliyat olib borish masalalari kelishib olindi.

Takidlash joiz, mazkur safar Prezidentimiz tomonidan 23 may kuni sport talimini yaxshilash, iqtidorli sportchilarni saralash va ularning zaxirasini yaratish, murabbiylar tayyorlashdagi ustuvor vazifalar yuzasidan o'tkazilgan videoselektor yig'ilishida berilgan topshiriqlar ijrosini taminlash maqsadida tashkil etilgan.

Hamyurtlarimizning Boltiqbo'yi davlatlariga tashrifi 24 iyungacha davom etadi.