Indor xokkey bo'yicha O'zbekiston chempionati g'oliblari aniq bo'ldi

“Barkamol avlod” stadionida O'zbekiston Respublikasi Jismoniy tarbiya va sport vazirligi tomonidan o'tkazilgan mamlakat chempionatida oltitadan erkaklar va ayollar jamoalari ishtirok etdi.

Erkaklar o'rtasidagi musobaqalarda Andijon, Toshkent, Namangan, Xorazm, Farg'ona viloyatlari terma hamda Andijon ixtisoslashtirilgan olimpiya zaxiralari maktab-internati jamoalari g'oliblik uchun bahs olib bordi.

Yakuniy natijalarga ko'ra, Andijon viloyati terma jamoasi birinchi o'rinni qo'lga kiritdi. Ikkinchi o'rin Toshkent viloyati, uchinchi o'rin Namangan viloyati terma jamoalariga nasib etdi.

Ayollar jamoalari o'rtasida esa Andijon, Buxoro, Samarqand, Farg'ona, Namangan va Xorazm viloyatlari terma jamoalari kuch sinashdi. Yakunda Buxoro viloyati terma jamoasi barcha raqiblaridan ustun kelib, birinchi o'ringa sazovor bo'ldi.

Andijon viloyati jamoasiga ikkinchi, namanganlik xokkeychi qizlarga uchinchi o'rin nasib etdi. CHempionatning g'olib va sovrindorlari tashkilotchilar tomonidan tegishli medallar, esdalik sovg'alari bilan taqdirlandi.