Islam Maxachev keyingi jangi muddati va ehtimoliy raqibni aytdi

Agar Jastin Getji Den Xukerni mag'lub eta olsa, Islam Maxachevning keyingi raqibi bo'lishi mumkin. Bu haqda chempionning o'zi Maxachqala aeroportida jurnalistlar bilan muloqotda aytib o'tdi. 

"Menga bu g'oya yoqyapti. CHunki hali Jastin bilan jang qilmaganman. Oliveyra va Armanga qarshi jang o'tkazganman. Yana eski raqiblarga qarshi jang uchun tayyorgarlik ko'rish men uchun katta motivaciya bo'lmaydi. Agar Getji bo'lajak jangida o'zini ko'rsata olsa, keyingi raqibim aynan u bo'lishi mumkin", - dedi Islam. 

SHuning barobarida Maxachev keyingi ehtimoliy raqiblari safidan Arman Carukyanni o'chirdi. Arman ikki hafta oldin jangga bir kun qolganida belidagi jarohat sabab o'z imkoniyatini yo'qqa chiqargandi. 

"Carukyan aniq keyingi raqibim bo'lmaydi. Buni Dana Uayt ham o'z intervyusida aytdi. Arman o'ziga berilgan imkoniyatdan "foydalanib" bo'ldi", - deya fikrini davom ettirdi Maxachev.  

Bundan tashqari, UFC chempioni qachon oktagonga qaytishni rejalashtirayotgani haqida berilgan savolga javob berdi.

"Katta ehtimol bilan iyul oyida Xalqaro janglar haftaligi bo'ladi. Agar UFC taklif qilsa, men iyulga tayyor bo'laman", - deya so'zlariga yakun yasadi chempion. 

Malumot uchun, Jastin Getji va Den Xuker o'rtasidagi jang 8 mart kuni Las-Vegasda tashkil etiladigan UFC 313 turniri doirasida bo'lib o'tadi.