Isroil Gran-prisi. Medallar jamg'arish bo'yicha kim peshqadam?

Yilning dastlabki nufuzli musobaqasida kecha birinchi kungi bahslar o'tkazildi va jami 5ta vazn toifasida g'olib hamda sovrindorlar nomi malum bo'ldi. 

Hozircha birinchi kungi natijalarga ko'ra, medallar jamg'arish bo'yicha Isroil terma jamoasi peshqadamlik qilyapti. Mezbonlar 2ta oltin, 1ta kumush medalini qo'lga kiritishdi. Ular hisobida bittadan beshinchi va ettinchi o'rinlar ham bor. 

Belgiya, Italiya va Kosovo terma jamoalari bittadan oltin medalga ega bo'lishdi. Ukrainada 2ta kumush, Rossiyada 1ta kumush, 2ta bronza, Gollandiyada 1ta kumush medali bor. 

Franciya, Buyuk Britaniya, Vengriya, Bolgariya, Ispaniya, Braziliya, Ruminiya va SHveycariya terma jamoalari hozircha bittadan bronza medaliga ega bo'lib turishibdi. Jami 15ta davlat dzyudochilari kamida bitta medalni qo'lga kiritib ulgurishdi. 

Bittadan beshinchi o'ringa ega Ozarbayjon, Portugaliya, Sloveniya hamda O'zbekiston terma jamoalari hozircha 16-19 -o'rinlarni band etishgan va o'ylaymizki, bugungi natijalardan so'ng terma jamoamiz medallar jamg'arish bo'yicha o'z o'rnini sezilarli darajada yaxshilab oladi.

Malumot uchun, 2019 yilning dastlabki nufuzli musobaqasi hisoblangan Isroil Gran-prisining umumiy mukofot jamg'armasi 100 000 AQSH dollarini tashkil qiladi. G'olib dzyudochilar pul mukofotidan tashqari Tokio-2020 Olimpiadasi yo'lidagi muhim 700 reyting ochkosini o'z hisoblariga qo'shib qo'yishadi.