Isroil Gran-prisi medalsiz, lekin qimmatli ochkolar bilan yakunlandi

Ushbu musobaqada sayyoramizning 5ta qitasi 54 davlatidan 400 nafarga yaqin polvonlar ishtirok etdi. Ular orasida 18 nafar dzyudochimiz ham medallar hamda Tokio-2020 Olimpiadasining muhim reyting ochkolari uchun bahs olib borishdi. 

Afsuski, Isroil Gran-prisida medal bo'lmadi. Turnirdagi biz uchun eng yaxshi natijani -66 kg vazn toifasidagi Sardor Nurullaev hamda eng og'ir - +100 kg vazndagi polvonimiz, Abdulla Tangrievning izdoshi sifatida qaralayotgan Bekmurod Oltiboev qayd etdi. Har ikki vakilimiz bronza medali uchun kechgan bahslarda imkoniyatni boy berib, beshinchi o'rin bilan kifoyalanishdi. Ular Tokio-2020 yo'lidagi qimmatli 252 reyting ochkosiga ega bo'lishdi. Bu esa har ikki dzyudochimizning jahon reytingidagi o'rinlarining yaxshilanishiga zamin yaratadi.  

Hamyurtlarimizdan Gulnoza Matniyazova ettinchi o'rinni band etdi. Xorazmlik sportchi qizimiz bronza medali uchun kechgan bahslarning dastlabkisida irlandiyalik Megan Fletcherga yutqazib qo'ydi va ettinchi o'rin bilan kifoyalandi. Matniyazova medalsiz qolgan bo'lsa-da, Tokio-2020 Olimpiadasi uchun muhim hisoblangan 182 reyting ochkosini qo'lga kiritdi. G'iyosjon Boboev esa 112 ochkoga ega bo'ldi. SHerali Jo'raev, SHahram Ahadov Gran-pridan 70 ochko ishlab olishdi.

SHu tariqa, o'zbekistonlik sportchilarning tunirdagi ishtiroki yakunlandi. Afsuski, dzyudochilarimiz musobaqani medalsiz yakunlashdi. Isroil Gran-prisi joriy yil hisobidan ilk xalqaro turnir bo'lgani uchun ham dzyudochilarimizning natijalari murabbiylarimiz kutganchalik bo'lmadi. 

O'ylaymizki, mavsumning ilk ishtirokidan tegishli xulosalar chiqariladi. Murabbiylar kengashi har bir bahsni muhokama qiladi. Bu esa keyingi xalqaro musobaqalarda natijalarning ijobiy tomonga o'zgarishiga zamin yaratadi.