Isroil Gran-prisi. Mezbonlar medallar jamg'arish bo'yicha yakka peshqadam!

Ushbu musobaqada sayyoramizning 5ta qitasi 54 davlatidan 400 nafarga yaqin polvonlar ishtirok etdi. Ular orasida 18 nafar dzyudochimiz ham medallar hamda Tokio-2020 Olimpiadasining muhim reyting ochkolari uchun bahs olib borishdi. 

Medallar jamg'arish bo'yicha isroillik dzyudochilarga teng keladigan raqib topilmadi. Mezbonlar jami 4ta oltin, 2ta kumush, bitta bronza medali bilan norasmiy umumjamoa hisobida birinchi o'rinni egallashdi. Ular hisobida yana bittadan beshinchi va ettinchi o'rinlar ham bor. 

Italiya va Franciya terma jamoalari 2tadan oltin medalni qo'lga kiritishdi. Kumush medallar soni 3ta bo'lgani uchun italiyaliklar ikkinchi pog'onadan joy olishdi. Kosovo, Ozarbayjon, Belarus, Sloveniya, Belgiya va SHveciya terma jamoalari bir nafardan Gran-pri chempioniga ega bo'lishdi. Jami 23 davlat sportchilariga uyga kamida bitta bronza medali bilan qaytish nasib etdi. 

O'n sakkiz nafar sportchi bilan ishtirok etgan O'zbekiston terma jamoasi ikkita beshinchi va bitta ettinchi o'rin bilan umumjamoa hisobida 24-pog'onadan joy oldi. Yigirma bitta mamlakat dzyudochilari bironta ham o'ringa ega bo'lishmadi.