Isroil Gran-prisining birinchi kunidagi ishtirokimiz qanday bo'ldi?

Kecha erkaklar -60 va -66, ayollar esa -48, -52 hamda 57 kg vazn toifalarida medallar uchun bahs olib borishdi. Dzyudochilarimizdan 7 nafari 4ta vazn toifasida tatamiga chiqishdi. Ulardan eng yaxshi natijani -66 kg vazn toifasidagi polvonimiz Sardor Nurullaev qayd etdi. U yarim finalga qadar mag'lubiyatsiz etib borib yakunda 5-o'rinni qo'lga kiritdi. 

Sardor ikkinchi bosqichda argentinalik Tal Almogni, keyin slovakiyalik Matey Polyakni, chorak finalda jahon chempionati sovrindori franciyalik Matiash Busharni mag'lub etib, yarim finalga yo'l oldi. Final ostonasida esa ukrainalik Bogdan Yadovga yutqazib qo'ydi. Bronza medali uchun kechgan uchrashuvda rossiyalik Islam Xametovning qo'li baland keldi. SHunga qaramay, Sardor Nurullaev Tokio-2020 yo'lidagi qimmatli 252 reyting ochkosini qo'lga kiritdi. Bu esa uning jahon reytingidagi o'rnining yaxshilanishiga zamin yaratadi.

Ushbu vazn toifasidagi yana bir vakilimiz istedodli SHahram Ahadov o'z ishtirokini ikkinchi davradan boshladi va braziliyalik taniqli dzyudochi Diego Santosni engdi. Lekin keyingi bosqichda ozarbayjonlik Orxan Safarovga imkoniyatni boy berib, musobaqadagi ishtirokini yakunladi. SHahram Gran-pridagi ishtirokidan 70 reyting ochkosi ishlab oldi. Bu vaznda italiyalik Manuel Lombardo chempionlik shoxsupasiga ko'tarildi. 

-60 kg vaznda ham yurtimiz sharafini ikki sportchimiz himoya qildi. Kemran Nurullaev murosasiz bahsda braziliyalik taniqli dzyudochi Felipe Kitadaiga imkoniyatni boy bergan bo'lsa, Rahmon Jumaev turkmanistonlik raqibi Haqberdi Jumaevni mag'lubiyatga uchratdi. Jumaev ikkinchi bosqichda britaniyalik Eshli Makkenziga yutqazib qo'ydi. 

Ayollar o'rtasida -52 kg vazn toifasida qatnashgan Gulnoza Ziyaeva ilk bosqichda ispaniyalik Sofiya Xogrefedan ustun keldi. Ikkinchi davrada esa AQSH vakilasi Anjelika Delgadoga yo'lni bo'shatib berdi. Bu vazndagi ikkinchi vakilamiz Diyora Keldiyorova ham ikkinchi ikkinchi davrada yurishini to'xtatdi. O'smirlar o'rtasida jahon chempioni bo'lgan Diyora italiyalik Martina Kastognoladan ustun keldi. Ammo, tajribali mezbonlar vakilasi Gefen Primodan engildi. -57 kg vazndagi vakilamiz Amina Mamedova birinchi davrada italiyalik Martina Loga yutqazdi.