Isroil Madrimov Qozog'iston OAVsiga intervyu berdi: Golovkin bilan hamkorlik, o'zbek - qozoq qarama qarshiligi va boshqa mavzular haqida

- Isroil, raqib haqida nima deya olasiz? Navbatdagi nokautga tayyormisiz?

- Alexandro Barrera yaxshi raqib, tajribali. Prof ringda 30 dan ortiq jang o'tkazgan. Uning janglarini ko'rdim, pastdan yaxshi zarba bera oladi. Jang yaxshi bo'ladi. Men yaxshi tomonlama o'zimni ko'rsatib, yaxshi nokaut evaziga g'alaba qozonmoqchiman. 

- Golovkin bilan bir oqshomda ikkinchi marotaba jang qilasiz. Hamkorligingiz qanday boshlandi?

- Yashirib o'tirmayman, bungacha xech qachon Gennadiy Golovkin bilan uchrashaman deb o'ylamagandim. Ringda Tecate yozuvi bo'ladigan shouda ishtirok etishni qachonlardir orzu qilardim. Mana orzular ushalmoqda va men Golovkinning anderkartida jang qilyapman. Bu men uchun sharaf. Promouterim Andrey Ryabinskiy men uchun yaxshi imkoniyatlarni taqdim etmoqda. Men prof ringda uchta jang o'tkazdim, shunday bo'lsada menga qiziqa boshlashmoqda. 

- Siz yaqinda ijtimoiy tarmoqda Gennadiy sevimli bokschingiz ekanligi haqida gapirdingiz. U ishtirokida tomosha qilgan jangingizni eslay olasizmi?

- Men anchadan buyon Golovkinni kuzataman. CHunki, uning o'zgacha jang uslubi bor. Uning zarbasi juda yaxshi, u nokautchi. O'zi ham yaxshi inson. Uni hayotda uchratganimda shokka tushgandim desam ham bo'ladi. Men ham Gennadiy Golovkin kabi bo'lishni istayman. U hayotda ham, sportda ham yaxshi inson. Bazida mashg'ulotlarda uning zarbalarini takrorlashga urinaman. 

Biz tashqi tomonlama bir-birimizga o'xshashimizni aytishadi. 

- Kelajakda vazningizni o'zgartirishni rejalashtirmayapsizmi?

- Avvalo shu vaznda chempion bo'lishim kerak. Ammo kelajakda vaznimni almashtirgan bo'lardim.

- Professional boksga o'tganingizdan so'ng qozog'istonlik Tursunbay Qulaxmetga mag'lub bo'ldingiz. Uni JCHda kuzatdingizmi?

- Men u bilan ikki marotaba jang qilganman. Birinchisi - Prezident kubogida. O'shanda g'alaba qozongandim. Ikkinchisi esa Osiyo chempionatida bo'lgandi, yutqazib qo'ygandim. Ammo, o'sha payt men professional boksga o'tganimga yarim yil bo'lgandi. O'sha paytda uslubimni o'zgartirgandim va ortga qaytish biroz qiyin bo'lgandi. Boshqa qo'lqoplar, boshqa temp. Qulaxmet yaxshi bokschi. Unga omad tilayman. U yaqinda JCH sovrindori bo'lganini bilaman. Menga Qozog'iston terma jamoasidan shuningdek Abilxan Amanqul yoqadi. U bilan Osiyo o'yinlari finalida jang qilgandik. 

- Rasmiy musobaqalarda Qozog'iston va O'zbekiston qarama-qarshiligi bor. O'zbekistonda ham Qozog'istonning qo'lga kiritgan medallarini kuzatib o'tirishadimi?

- SHunday. Bu uzoq vaqtdan buyon bor. Barcha musobaqalarda o'zbeklar va qozoqlar kim ko'proq medal olishi, kim umumjamoa hisobida yuqori bo'lishini kuzatib turishadi. Jahon chempionatida yigitlarimiz muvaffaiyatli ishtirok etishdi, bundan juda xursand bo'ldim. Bizning Bahodir Jalolov chempion bo'ldi va musobaqaning eng yaxshi bokschisi bo'ldi. U finalda aynan qozog'istonlik Kamshibek Konkabaevdan ustun keldi. Ular ancha vaqtdan buyon bir-biriga raqobatchi hisoblanishadi. 

- Qozog'istonda sizni prof ringdagi faoliyatingizni kuzatib borishlarini bilasizmi?

- Bilaman, Sobiq Ittifoq mamlakatlarida kuzatishmoqda. Endi Gennadiyga o'xshab Amerikada mashhurlikka erishmoqchiman. SHuning uchun yaxshi boks ko'rsatishim lozim. Yana inglizchani ham o'rganish kerak. 

- Sizni "O'zbekistonlik Monstr" deb atashlariga qanday munosabatdasiz?

- Meni shunchaki yaxshi bokschi deb atashlari etarli bo'lardi. 

- "O'zbekistonlik Monstr" yaxshi bola.

- Agar sen "Monstr" bo'lsangda yaxshi insonligingcha qolishing lozim (kuladi). Ikkinchi jangimda venesuelalik Frenk Roxasni ikkinchi raundda nokaut qilib, WBA InterContinental kamarini qo'lga kiritganimdan so'ng o'z uslubimda salto amalga oshirgandim. Ammo o'shanda raqibim yomon axvolda ekanligini bilmaganman. Agar bilganimda bunday qilmagan bo'lardim. Promouterim barchasi joyida ekanligi va unga kasalxonadan javob berishganini aytmagunicha havotir olib o'tirdim. Menda raqibimga ataylab zarar etkazish maqsadi bo'lmaydi. 

Vesti.kz saytidan tarjima qilindi