Istomin Mayami ”Masters”dagi ishtirokini g'alaba bilan boshladi

Xabar berganimizdek, “Masters” turkumiga kiruvchi mazkur musobaqaning saralash bahslarida mamlakatimizning birinchi raqamli tennischisi Denis Istomin ham ishtirok etyapti. Turnir g'olibi 1,354,010 AQSH dollari pul mukofoti hamda 1000 reyting ochkosini qo'lga kiritadi.

Hozirgina hamyurtimiz saralashning ilk davra uchrashuvini yakunladi. Denis barbadoslik Derian Kingga qarshi kortga chiqdi. Ikki soatu 20 daqiqa davom etgan bahsda Denis 6:4, 3:6, 7:6(3) hisobidagi qiyin g'alabani qo'lga kiritdi. 

Taqqoslash uchun, Istomin dunyo reytingida 102, King esa 191-o'rinni egallab turibdi. Endi tennischimiz asosiy to'rga chiqish uchun slovakiyalik Lukash Lackoga qarshi kortga chiqadi. Lukash bir necha daqiqa avval dunyoning 67-raketkasi argentinalik Xuan Londeroni 6:4, 6:1 hisobida dog'da qoldirdi.