Istomin Segoviya turnirining asosiy to'riga yo'l oldi

Mukofot jamg'armasi 67,960 evroni tashkil etuvchi Segovia Challenger turnirida hamyurtimiz Denis Istomin ham o'z omadini sinab ko'rmoqda. Tennischimiz o'z ishtirokini saralash bahslaridan boshlagandi. 

Avvaliga u 1/2 finalda braziliyalik Uilson Leyteni 5/7, 7/5, 7/5 hisobida mag'lubiyatga uchratdi. Kecha esa saralashning finalida germaniyalik Elmar Eyupovich ham uch set natijasiga ko'ra taslim etildi. Birinchi setni 2/6 hisobida boy bergan Istomin ajoyib kambekni amalga oshirdi. Denis keyingi ikki setda 7/6(4), 6/4 hisobida zafar quchib, turnirning asosiy to' bahslariga yo'llanmani qo'lga kiritdi. 

Denis Istomin uchrashuv davomida 10 ta eys, 2 ta qo'shxato, Elmar Eyupovich esa 6 ta eys, 7 ta qo'shxato qayd etdi. Hamyurtimiz saralashda 12, raqibi esa 6-raqam ostida tasniflangandi. Bu tennischilarning o'zaro ilk uchrashuvi edi. Bugun Istomin asosiy to'rning ilk davrasida rossiyalik 20 yoshli Alibek Kachmazovga qarshi kortga chiqadi. Ushbu bahs bizning vaqt bilan soat 16:00da boshlanadi.    

Taqqoslash uchun, hamyurtimiz ATP reytingida 438, Uilson 499, Eyupovich 386, Kachmazov esa 345-o'rinni egallab turibdi.