Istomin Segoviyadagi turnirda muvaffaqiyatli start oldi

Mukofot jamg'armasi 67,960 evroni tashkil etuvchi Segovia Challenger turnirida hamyurtimiz Denis Istomin ham o'z omadini sinab ko'rmoqda. Tennischimiz o'z ishtirokini saralash bahslaridan boshladi. 

Istomin saralashning 1/2 finalida braziliyalik Uilson Leytega qarshi kortga chiqdi. Ikki soatu 52 daqiqa davom etgan murakkab uchrashuvda Denis raqibini 5/7, 7/5, 7/5 hisobida mag'lubiyatga uchratdi. Istomin 15 ta, Leyte esa 1 ta eys zarbasini ijro etgan. 

Taqqoslash uchun, hamyurtimiz ATP reytingida 449, Uilson esa 499-o'rinni egallab turibdi. Bugun Denis asosiy to'rga yo'llanma beruvchi saralashning final uchrashuvida germaniyalik Elmar Eyupovichga qarshi kortga chiqadi. 

Reytingning 386-pog'onasini band etgan olmon tennischisi yarim finalda braziliyalik Tomas Beluchchini 6/7(8), 7/6(5), 7/6(5) hisobida engdi. Denis Istomin - Elmar Eyupovich uchrashuvi bizning vaqt bilan soat 17:00da boshlanadi.