Jahon chempionati. Afruza yana g'alaba qozondi, Javohir ham

8, 10 hamda 12 yoshli shaxmatchilar o'rtasida tashkil etilayotgan jahon chempionatida dunyoning 100ga yaqin mamlakatidan istedodli shaxmatchilar ishtirok etyapti.

Sakkiz yoshlilar o'rtasidagi musobaqada o'z imkoniyatini sinab ko'rayotgan Humoyun Bekmurodov nihoyat 6-turda g'alaba qozondi. Qora donalarda harakat qilgan hamyurtimiz JAR vakili Lexan Koningni taslim etdi.

O'n yoshli shaxmatchilar bahsida birinchi raqam ostida tasniflangan Islombek Sindorov oq donalarda o'ynashiga qaramay, belaruslik Silich Yaxorni enga olmadi. Bahs durang natija bilan yakunlandi.

O'n ikki yoshli shaxmatchilar musobaqasida ikkinchi tartib raqamli ishtirokchi bo'lgan Javohir Sindorov esa aksincha g'alabaga erishdi. U qora donalarda o'ynab, kanadalik Xuang Kyuni mag'lubiyatga uchratdi.

Qizlarimizdan Afruza Hamdamova beshinchi g'alabasini qo'lga kiritdi. U oq donalarda hindistonlik Rout Yashidadan ustun keldi. Yuliya Xegay qirg'izistonlik Azaliya Mirlankizi bilan murosaga keldi. Maftuna Bobomurodova esa rossiyalik Emiliya Zavivaevaga yutqazib qo'ydi.