Jahon chempionati. Afruzaning ilk mag'lubiyati, Sindorovda ham

8, 10 hamda 12 yoshli shaxmatchilar o'rtasida tashkil etilayotgan jahon chempionatida dunyoning 100ga yaqin mamlakatidan istedodli shaxmatchilar ishtirok etyapti.

Ular orasida hamyurtlarimiz – aka-uka jahon chempionlari Islombek va Javohir Sindarov, Osiyo chempioni Humoyun Bekmurodov, qizlardan Maftuna Bobomurodova, Yuliya Xegay va Afruza Hamdamovalar yurtimiz sharafini himoya qilishyapti.

Sakkiz yoshlilar o'rtasidagi musobaqada imkoniyatini sinab ko'rayotgan Humoyun Bekmurodov 5-turda qora donalarda harakat qilib, gruziyalik Jorj Klarksonga imkoniyatni boy berib qo'ydi.

O'n yoshli shaxmatchilar bahsida birinchi raqam ostida tasniflangan Islombek Sindorov qora donalarda amerikalik Niko CHasinga yutqazdi. O'n ikki yoshli shaxmatchilar musobaqasida ikkinchi tartib raqamli ishtirokchi bo'lgan Javohir Sindorov esa bu turda eronlik Eylia Zomoroddian bilan murosaga keldi.

Qizlarimizdan Afruza Hamdamova ketma-ket to'rtta g'alabadan so'ng ilk mag'lubiyatni qarshi oldi. Afruza qora donalarda o'ynab, BAA vakilasi Essa Roudaga yutqazdi.

Yuliya Xegay vetnamlik Tan Bui Vega imkoniyatni boy berdi. Maftuna Bobomurodova esa o'zbekistonlik shaxmatchilarning 5-turdagi yagona g'alabasini qo'lga kiritdi. U rossiyalik Galina Mixeevani taslim etdi.