Jahon chempionati. Hamyurtlarimizdan bu turda hech kim yutqazmadi

8, 10 hamda 12 yoshli shaxmatchilar o'rtasida tashkil etilayotgan jahon chempionatida dunyoning 100ga yaqin mamlakatidan istedodli shaxmatchilar ishtirok etyapti.

Etiborlisi, olti nafar shaxmatchimizdan bu turda hech biri mag'lubiyatga uchramadi. Sakkiz yoshlilar musobaqasida o'z imkoniyatini sinab ko'rayotgan Humoyun Bekmurodov 9-turda qora donalarda o'ynashiga qaramay, gruziyalik David Lomtadzeni mag'lubiyatga uchratib, ochkolarini 5taga etkazib oldi.

O'n yoshli shaxmatchilar bahsida birinchi raqam ostida tasniflangan Islombek Sindorov esa oq donalarda harakat qilib, mo'g'ulistonlik Bayartnar Erxes bilan durangga imzo chekdi.

O'n ikki yoshli shaxmatchilar musobaqasida ikkinchi tartib raqamli ishtirokchi bo'lib turgan Javohir Sindorov qora donalarda o'ynab, kolumbiyalik Xose Kardosoni mag'lubiyatga uchratdi.

Jahon chempionati kashfiyotiga aylangan Afruza Hamdamova bu turda g'alaba nashidasini surdi. U reytingda o'zidan ancha yuqorida turgan rossiyalik shaxmatchi Bikovskixdan ustun keldi.

Hamyurtlarimizdan Yuliya Xegay belgiyalik Tyane De Riskeni mag'lubiyatga uchratdi. Maftuna Bobomurodova esa rossiyalik Alisa Surovceva murosa yo'lini tanladi.