Jahon chempionati. Humoyunda ketma-ket ettinchi g'alaba, grossmeysterimiz yutqazdi

Nufuzli musobaqada O'zbekiston terma jamoasining bir necha yosh toifasidagi shaxmatchilari ham ishtirok etishyapti. Ulardan birgina Humoyun Bekmurodov bugungacha o'tkazilgan 7 ta partiyaning barchasida g'alaba qozonishga muvaffaq bo'lgan. 

Humoyun kecha o'tkazilgan 7-tur uchrashuvida qora donalarda harakat qilishiga qaramay, qozog'istonlik shaxmatchi Dinmuhammad Tulendinovni mag'lubiyatga uchratdi. Yosh grossmeysterimiz Javohir Sindarov esa kutilmaganda ozarbayjonlik Ugxur Ilyasliga imkoniyatni boy berib qo'ydi. 

SHaxmatchilarimiz orasida eng yuqori reyting ochkosiga ega Nodirbek Yoqubboev qora donalarda o'ynab, turkiyalik Alp Kansunni engdi. Afruza Hamdamova 7-turda mag'lubiyat alamini totib ko'rdi. U oq donalarda o'ynasa-da, yakunda mo'g'ulistonlik raqibasiga yutqazib qo'ydi. 

17 yoshlilar turnirida qatnashayotgan SHamsiddin Vohidov ozarbayjonlik Hazar Babazadadan ustun keldi. Bahrom Bahrillaev SHri-Lanka shaxmatchisi bilan durang o'ynadi. Akbar Allaberganov mezbon shaxmatchidan ustun ekanligini amalda isbotladi. 

Ali Qosimov bu turda turkiyalik Serxan O'zdemirni taslim etdi. Umida Omonova mo'g'ulistonlik Davaaku Munkjulga imkoniyatni boy berdi. Zaynura Abrorova bu turda g'alaba nashidasini surdi. U qirg'izistonlik Aliya SHarabiddinovani mag'lub etdi.