Jahon chempionati. Ochko yo'qotmagan birgina Humoyun qoldi

Nufuzli musobaqada ishtirok etayotgan O'zbekiston terma jamoasining 4 nafar azosi mag'lubiyatsiz yurishini davom ettirmoqda. Lekin ulardan birgina Humoyun Bekmurodov bugungacha o'tkazilgan 5 ta partiyaning barchasida g'alaba nashidasini surgan. 

Yosh grossmeysterimiz Javohir Sindarov, shuningdek, Nodirbek Yoqubboev hamda Afruza Hamdamova kecha o'tkazilgan 5-turda durang o'ynab, ilk bor ochko yo'qotishdi. Humoyun esa qora donalarda o'ynashiga qaramay, o'zi singari 4 ta partiyaning barchasida zafar quchgan qozog'istonlik Edgar Mamedovni mag'lub eta oldi. 

O'n besh yoshli Sindarov 5-turda turkiyalik Ekin O'zinir, Yoqubboev yana bir mezbon shaxmatchi Kagan Aydinchelebi, Hamdamova esa qozog'istonlik Aysha Zakirova bilan durang o'ynadi. 17 yoshlilar turnirida qatnashayotgan SHamsiddin Vohidov qozog'istonlik Abdilmansur Abdixayirni engdi. 

Akbar Allaberganov mo'g'ulistonlik Munxbat Ochirbatdan ustun keldi. Bahrom Bahrillaev hindistonlik Rafael SHaron bilan murosaga keldi. Ali Qosimov, Zaynura Abrorova va Umida Omonovalar esa raqibalariga imkoniyatni boy berib qo'yishdi.