Jahon chempionati qahramonlari bugun yurtimizga qaytadi

Eslatib o'tamiz, musobaqaning rapid yo'nalishi bo'yicha hamyurtimiz 17 yoshli Nodirbek Abdusattorov sayyoramizning eng kuchli shaxmatchisi ekanligini isbotladi.

Rapid yo'nalishidan so'ng, 180 nafar shaxmatchilar ikki kun davomida blic yo'nalishida o'zaro musobaqalashdi. O'tkazilgan bahslar yakuniga ko'ra, Javohir Sindarov hamyurtlarimiz ichida eng yaxshi natijani qayd etdi.

SHaxmatchimiz 21 imkoniyatdan 13,5 ochko jamg'argan holda 8-o'rinni egalladi. SHuningdek, SHamsiddin Voxidov 12,5 ochko bilan 40, Nodirbek Abdusattorov esa 12 ochko bilan 43-o'rinni band etdi. Jahongir Voxidov esa 11 ochko bilan 80-o'rindan joy oldi.

1 yanvardan 2 yanvarga o'tar kechasi jahon chempinligini qo'lga kiritgan Nodirbek Abdusattorov va boshqa shaxmatchilarimiz joy olgan samolyot Islom Karimov nomidagi Toshkent xalqaro aeroportiga kelib qo'nadi.

Hamyurtlarimiz bir qator sportimiz mutasaddilari, keng jamoatchilik va mamlakatimizdagi ommaviy axborot vositalari vakillari tomonidan kutib olinadi.

Eslatib o'tamiz, shaxmat bo'yicha jahon chempionatida g'oliblikni qo'lga kiritgan va mazkur sport turining rapid yo'nalishida jahonning eng yosh chempioni sifatida etirof etilgan Nodirbek Abdusattorov O'zbekiston Respublikasi Prezidentining farmoni bilan “Mard o'g'lon” davlat mukofoti bilan taqdirlandi hamda Prezidentimiz ko'rsatmasi bilan unga Toshkent shahrida 2 xonali xonadon sovg'a qilinadi.