Jahon chempionatida yana bir medalga ega chiqdik, umumjamoa hisobida beshinchi bo'ldik!

Quvonarlisi, musobaqaning so'nggi kuni ham terma jamoamiz uchun muvaffaqiyatli kechdi. So'nggi kungi bahslarda startga chiqqan O'zbekiston davlat jismoniy tarbiya va sport universiteti talabalari Dilnoza Rahmatova hamda Nilufar Zokirovalar juftligi kanoeda eshkak eshish bo'yicha 500 metr masofaga o'tkazilgan poygada kumush medalga sazovor bo'ldi.

Qizlarimiz belgilangan masofani rossiyalik sportchilar Kseniya Kurax va Darya Xarshenko juftligidan keyin bosib o'tishdi. Rahmatova/Zokirova juftligi musobaqa g'oliblaridan atigi 0,778 soniyaga ortda qoldi. Kuchlilar uchligini Vengriya terma jamoasi azolari Sofiya Kisban va Giada Bragato juftligi yakunlab berdi.

SHu tariqa O'zbekiston terma jamoasi azolari 23 yoshgacha bo'lgan sportchilar o'rtasidagi jahon chempionatida ikkita oltin va bitta kumush medalga sazovor bo'ldi. Bu esa mamlakatimiz sport delegaciyasiga jahon chempionatini umumjamoa hisobida 5-o'rinda yakunlash imkonini taqdim etdi.