Jahon chempionatidagi eng yaxshi natijamiz 4-o'rin bo'ldi

8, 10 hamda 12 yoshli shaxmatchilar o'rtasida tashkil etilgan jahon chempionatida dunyoning 100ga yaqin mamlakatidan istedodli shaxmatchilar ishtirok etdi. Ular orasida terma jamoamizning 6 nafar azosi ham o'z imkoniyatini sinovdan o'tkazdi.

Lekin natija murabbiylar kutganchalik bo'lmadi. Jahon chempionatidagi eng yaxshi natijamiz 4-o'rin bo'lganligi fikrimizni tasdiqlaydi. Aka-uka jahon chempionlari Islombek va Javohir Sindarovlar o'z yosh toifalarida birinchi hamda ikkinchi raqamli shaxmatchi bo'lsalarda, natijaga shunga monand bo'lmadi.

Sakkiz yoshlilar musobaqasida o'z imkoniyatini sinab ko'rgan Humoyun Bekmurodov 11 imkoniyatdan 6,5 ochko to'plab, 47-o'rinni egalladi. O'n yoshli shaxmatchilar bahsida birinchi raqam ostida tasniflangan Islombek Sindorov 6 ochko bilan 49-o'rin bilan cheklandi.

O'n ikki yoshli shaxmatchilar musobaqasida ikkinchi tartib raqamli ishtirokchi bo'lgan Javohir Sindorov 7 ochko bilan 18-pog'onadan joy oldi. Jahon chempionati kashfiyotiga aylangan Afruza Hamdamova 11 imkoniyatdan 8 ochko to'plab, kuchli to'rtlikka yakun yasadi.

Hamyurtlarimizdan Yuliya Xegay 5,5 ochko bilan 55, Maftuna Bobomurodova esa 7,5 ochko bilan 11-o'rinni band etdi.