Jahon chempionatidan medallar shodasi bilan qaytgan qoraqalpog'istonlik belbog'li kurashchilar kutib olindi

Dunyoning o'ttizdan ziyod davlatining sara kurashchilari jam bo'lgan jahon chempionatining belbog'li kurash yo'nalishi erkin va klassik yo'nalishida ishtirok etgan terma jamoamiz 21 ta oltin, 11 ta kumush va 26 ta bronza medalini qo'lga kiritib, umumjamoa hisobida faxrli birinchi o'rinni egalladi.

Albatta, ushbu jahon chempionatida etakchilik qilishda milliy terma jamoa tarkibidan joy olgan Qoraqalpog'iston polvonlarining ham natijalari etirofga sazovor.

Bokenbay Saduakasov, Qayrat Sariev va Qaynarbek Sariev shogirdlaridan Lazzat Zeripbay qizi (kattalar, 76 kg.) 3-o'rin, Sevara SHajenova (U-20, 66 kg.) 1-o'rin, Moldir Alimbaeva (U20, 48 kg.) 1-o'rin, Jasmina Oralbaeva (U20. 63 kg.) 2-o'rinni band etdi. 

SHu tariqa, Qozon shahrida o'tgan jahon chempionatida munosib ishtirok etgan va yorqin g'alabalarni qo'lga kiritgan nukuslik sportchilar ham qaytib kelishdi. SHu kuni olimpiya va milliy sport turlari bo'yicha Nukus oliy sport mahorati maktabida g'olib sportchilarni tantanali kutib olish marosimi bo'lib o'tdi. 

Marosimda Qoraqalpog'iston Sport vazirligi, olimpiya va milliy sport turlari bo'yicha Nukus oliy sport mahorati maktabi, Qoraqalpog'iston davlat universiteti, O'zbekiston davlat jismoniy tarbiya va sport universiteti Nukus filiali vakillari, sportchilarning ota-onalari va yaqinlari ishtirok etishdi. 

Ilhom RAHMONOV tayyorladi