Jahon chempionatining uchinchi kun bahslari oldidan shaxmatchilarimiz nechanchi o'rinlarda borishyapti?

Umumiy mukofot jamg'armasi 1 million AQSH dollarini tashkil etgan jahon birinchiligining ikkinchi kungi bahslaridan so'ng eng yaxshi natijani kutilganidek Nodirbek Abdusattorov qayd etib turibdi. 

Rapid yo'nalishida amaldagi jahon chempioni, o'z unvonini himoya qilayotgan Nodirbek o'tkazilgan 9 partiyada 7 ochko jamg'arib, 178 shaxmatchi orasida qo'shimcha ko'rsatkichlarga ko'ra 3-o'rinni egallab turibdi. Ikkinchi pog'onada borayotgan rossiyalik Vladimir Fedoseev hisobida ham 7 ochko bor. 

Jahon toji sohibi Magnus Karlsen esa 7,5 ochko bilan turnir jadvalida peshqadamlik qilyapti. Abdusattorov 9 partiyaning 6 tasida g'alaba qozondi, ikki bor durang o'ynadi va faqat norvegiyalik Magnus Karlsenga imkoniyatni boy berib qo'ydi. 

9-turdan keyin shaxmatchilarimiz egallab turgan o'rinlar:

3. Nodirbek Abdusattorov - 7 ochko

30. Nodirbek Yakubboev - 5,5 

79. Javohir Sindarov -5

89. SHamsiddin Vohidov - 4,5

115. Muhiddin Madaminov - 4

123. Jahongir Vohidov - 4 

142. Muhammadzohid Suyarov - 3,5

161. Humoyun Begmuratov - 3

Ayollar o'rtasida kecha 4 ta partiya o'ynaldi. Qizlarimizdan eng yaxshi natijaga Umida Omonova erishib turibdi. Kecha u 3 g'alaba va bir durang natija qayd etdi. Omonova qo'shimcha ko'rsatkichlarga ko'ra 4,5 ochko bilan 89-pog'onadan 40-o'ringa ko'tarilib oldi. 27-o'rinni egallab turgan shaxmatchida ham 4,5 ochko bor. 

Uzoq tanaffusdan so'ng terma jamoaga qaytgan mamlakatimizning birinchi ayol grossmeysteri Nafisa Mo'minova esa 8 imkoniyatdan 4 ochko jamg'ardi va qo'shimcha ko'rsatkichlarga ko'ra 98 ishtirokchi orasida hozircha 44-pog'onaga joylashgan.  

Qizlar

40. Umida Omonova - 4,5 ochko

44. Nafisa Mo'minova - 4 

64. Afruza Hamdamova - 3,5