Jahon terma jamoasi tarkibida birgina Madiyar Saidrahimov g'alaba qozondi

"VTB Arena" mezbonlik qilgan boks kechasida Moskvaning "Dinamo" hamda Jahon boks terma jamoalari o'zaro ringda to'qnash kelishdi. Turnir 7 ta olimpiya vazn toifasida o'tkazildi. Janglar 3 daqiqadan 3 raund davom etdi. 

Biz uchun ahamiyatlisi, jahon boksi yulduzlari terma jamoasi tarkibida hamyurtimiz Madiyar Saidrahimov ham jang o'tkazdi. -92 kg vazn toifasidagi charm qo'lqop ustamiz mezbon bokschi Ramazan Dadaevga qarshi ringga ko'tarildi. Jahon va Osiyo chempionati sovrindori hisoblangan Madiyar raqibini hakamlarning yakdil qarori bilan ochkolar hisobiga ko'ra mag'lubiyatga uchratdi. 

Aynan Madiyar Saidrahimov Jahon terma jamoasi tarkibida g'alaba qozongan yagona bokschi bo'ldi. Qolgan barcha juftliklarda "Dinamo" jamoasi bokschilari zafar quchishdi.    

Barcha juftlikdagi natijalar:

51 kg: Edmond Xudoyan hakamlar qaroriga ko'ra namibiyalik Immanuel Yozefni taslim etdi;

57 kg: Eduard Savvin ikkinchi raundda qozog'istonlik Iskander Xarsanni texnik nokautga uchratdi;

63,5 kg: Ilya Popov hakamlarning yakdil qarori bilan armanistonlik Narek Oganesyanni mag'lub etdi;

71 kg: Igor Sviridchenkov hakamlarning yakdil qarori bilan kongolik Stiv Kulengulukudan ustun keldi;

80 kg: Egor SHapochanskiy birinchi raundda singapurlik Kittipong Czyan Xao Xoni texnik nokautga uchratdi;

92 kg: Ramazan Dadaev hamyurtimiz Madiyar Saidrahimovga ochkolar hisobida yutqazdi;

+92 kg: Yaroslav Doronichev hakamlar qarori bilan kamerunlik Mvogo Amuguni engdi.