Jahongir Vohidov "Oskemen Open 2024" turniri sovrindori

Musobaqaning "Masters" guruhida 20 grossmeyster, 29 xalqaro masterlarning ishtirok etgani bahslarning murosasiz kechishini taminladi. Armanistonlik grossmeysterlar Manuel Petrosyan (2631) va Aram Akopyan (2617), xitoyliklar Syuy Syanyuy (2621), Bay Czinshi (2549), eronlik Bardiya Daneshvar (2613), hindistonlik Seturaman (2576) hamda hamyurtimiz Jahongir Vohidov (2572) g'oliblik uchun asosiy davogarlar sifatida etirof etilgandi. 

O'nta tur davom etgan musobaqa yakunida Jahongir Vohidov 10 imkoniyatdan 7,5 ochko jamg'arib, qo'shimcha ko'rsatkichlarga ko'ra 3-o'rinni egalladi. Grossmeysterimiz bronza medali bilan birga 5 200 AQSH dollar miqdoridagi pul mukofotini ham qo'lga kiritdi. U so'nggi turda oq donalarda harakat qilib, rossiyalik Dmitriy Bocharovni taslim etdi. Turnirning mukofot jamg'armasi deyarli 50 000 AQSH dollarini tashkil qildi. 

SHaxmatchilarimizdan Muhiddin Madaminov 6,5, Muhammadzohid Suyarov va Azamat Daurimbetov 5, Bahrom Bahrillaev esa 4,5 ochko jamg'arishga muvaffaq bo'ldi. "Masters" turniri g'olibligi 8 ochko to'plagan ukrainalik Vitaliy Bernardskiyga nasib etdi. Jahongir singari 7,5 ochko jamg'argan Bay Czinshi ikkinchi o'rinni egalladi.