Jahonobodda jahon chempionlari bellashdi

Qishloq fuqorolar yig'ini, mahalla faollari va faxriy polvonlar tashabbusi bilan tashkil etilgan tadbirda dor o'yinlari bilan birga har doimgidek belbog'li kurash musobaqasi ham o'tkazildi.

Murosasiz bellashuvlarda o'smirlar, yoshlar, kattalar va faxriy polvonlar gilamga chiqib, o'z mahoratlarini namoyish etdilar. Bu borada eng qiziqarli bahs kutilganidek, mutloq vaznda bo'lib o'tdi. Unda mahalliy polvon, jahon chempioni Zaylobiddin Ortiqov hamda Buvayda tumanilik jahon chempioni Obidali Mavlonov bosh sovrin uchun bellashdi. Muxlislarga olam-olam quvonch baxsh etgan qizg'in kurashda Zaylobiddinning qo'li baland keldi.

- Avvalo tashkilotchilarga katta rahmat. Hozirga qadar juda ko'p xalqaro musobaqalarda gilamga chiqqanman. Lekin o'zim tug'ilib o'sgan qishlog'im, barcha yaqinlarim oldida g'alaba qozonishning gashti baribir boshqacha ekan, -deydi 2013 yili Qozon shahrida bo'lib o'tgan Butunjahon Talabalar universiadasi sovrindori Zaylobiddin Ortiqov.

O'z o'rnida takidlash kerak, birgina Jahonobod qishlog'idan mustaqillik yillarida aka-uka jahon chempionlari – Zohid va Zaylobiddin Ortiqov, jahon chempionatining sovrindorlari Zohid Ismoilov, Bunyod To'xtasinov, Bahrom Odilov kabi polvonlar etishib chiqqan.

Ularning ustozi esa faxriylar o'rtasida jahon chempioni Abdulla Mamayusupov hisoblanadi. Belbog'li kurash bo'yicha terma jamoa bosh murabbiyi, O'zbekiston Davlat jismoniy tarbiya institutining katta o'qituvchisi SHavkat Mirzaqulov ham shu qishloq farzandi bo'lib, milliy sportimiz sirlarini aynan mana shu  Jahonobod qishlog'ida o'zlashtirgan.