Jalolovda mag'lubiyat, Rasulov esa jahon chempionati bronza medali uchun kurashadi

Yigirma bir yoshgacha bo'lgan kurashchilar o'rtasida tashkil etilayotgan dunyo birinchiligida sayyoramizning 53 davlatidan 500 nafardan ziyod kurashchilari qatorida O'zbekiston erkin va yunon-rum kurashlari yurtimiz sharafini himoya qilmoqda.

Kecha erkin kurash bahsoarida o'smirlar va yoshlar o'rtasida jahon chempioni, 2018 yil Argentinada o'tgan uchinchi o'smirlar Olimpiadasi g'olibi, "Sport Oskari" mukofoti sohibi, 19 yoshli Umidjon Jalolov (61 kg) nimchorak finalda ozarbayjonlik Abdulfaz Nasirovga alamli tarzda yutqazib qo'ygandi. Yakuniy hisob 6-6 ko'rinishida bo'lsa-da, so'nggi ballni qo'lga kiritgani uchun Nasirov chorak finalga yo'l olgandi. 

Agar Abdulfaz finalga etib kelganida, Jalolovda bronza medali uchun kurashish imkoniyati yuzaga kelar edi. Lekin amalda unday bo'lmadi. Ozarbayjonlik kurashchi chorak finalda eronlik raqibi Rahman Amouzadxaliliga 2-12 hisobida imkoniyatni boy berdi. 

92 kg vaznda gilamga chiqqan 20 yoshli Muhammadrasul Rahimov 1/8 finalda AQSH kurashchisi, 19 yoshli Rokki Jozef Elamga qarshi bahs olib bordi va 3-8 hisobida engildi. Jalolovning raqibidan farqli ravishda Elam finalgacha etib bordi. SHu boisdan ham bugun Muhammadrasul bronza medali yo'lidagi o'tish bellashuvida hindistonlik Prutviraj Patilga qarshi gilamga chiqadi. G'alaba qozongan taqdirda uni bronza medali uchun kechadigan bahsda rossiyalik Ivan Kirillov kutib turibdi.