Jamoaviy O'zbekiston kubogi Buxoroda o'tkaziladi

10, 12, 14 hamda 16 yoshgacha bo'lgan o'smirlardan iborat hududiy terma jamoalar o'rtasida o'tkaziladigan ushbu musobaqada Qoraqalpog'iston Respublikasi, barcha viloyatlar va Toshkent shahrining eng iqtidorli yosh shaxmatchilaridan iborat jamoalar g'oliblik uchun dona surishadi.

Jami 7 turdan iborat turnir shveycarcha tartibda o'tkaziladi. Musobaqada elektron soatlardan foydalaniladi va har bir ishtirokchiga o'yin oxiriga qadar 90 daqiqadan vaqt beriladi.

Musobaqaga Buxoro tumani “Rabotiqalmoq” MFY hududida joylashgan “Lazzat” restorani mezbonlik qiladi. Jamoaviy O'zbekiston kubogida har bir jamoa uchun badal miqdori 500 000 so'mni tashkil qiladi.

O'zbekiston shaxmat federaciyasi matbuot xizmatining xabar qilishicha, mukofot jamg'armasi 12 000 000 so'mni tashkil qiladigan O'zbekiston kubogida g'olib chiqqan jamoa 4 000 000 so'm miqdoridagi pul mukofoti bilan taqdirlanadi. 2-o'rin uchun 3 200 000 so'm hamda 3-o'ringa sazovor bo'lgan jamoa esa 2 800 000 so'm miqdoridagi mukofotni qo'lga kiritadi.