Jasur Matchanov Moskvada rossiyalik hamkasbi bilan uchrashuv o'tkazdi

Bugun ana shu hamkorlik doirasida O'zbekiston Milliy olimpiya qo'mitasi Bosh kotibi Jasur Matchanov hamda vice-prezident Ahmadjon Rahimov Moskvada joylashgan Rossiya Olimpiya qo'mitasi binosida uchrashuv o'tkazishdi. Unda mezbonlar tomonidan Bosh kotib Anastasiya Davidova, Bosh kotib o'rinbosari - Xalqaro aloqalar boshqarmasi rahbari Yuriy Yurev hamda sport direktori Andrey Konokotinlar ishtirok etishdi.

Uchrashuv davomida tomonlar o'zaro kelishuv asosida ishni davom ettirish, Olimpiya o'yinlarida ko'plab medallar jamlanmasi o'ynaladigan suv sporti va engil atletika sport turlari bo'yicha murabbiylarni terma jamoamizga jalb qilish, suv sporti turlari (suv polosi va sinxron suzish) bo'yicha qo'shma o'quv-mashg'ulot yig'inlarini tashkil etish masalalari ko'rildi.

SHuningdek, rossiyalik mutasaddilar mart oyida poytaxtimizda foydalanishga topshiriladigan "Humo" ko'ptarmoqli arenasining ochilish marosimida ishtirok etish istagini bildirishdi. O'z navbatida, Jasur Matchanov mazkur tashrifdan faqat va faqat xursand bo'lishini bildirdi.

Bundan tashqari, Rossiya Olimpiya qo'mitasi vakillari o'zbek og'ir atletikasi so'nggi yillarda sezilarli ravishda o'sganini qayd etishdi. Ular tomonidan Tokio 2020 Olimpiadasi oldidan so'nggi o'quv-mashg'ulot yig'inini birgalikda, Yaponiyaga yaqin bo'lgan hudud - Yujno-Saxalinsk shahrida tashkil etish taklifi bildirildi. O'z navbatida bu har ikkala tomon uchun ham manfaatli hamkorlik bo'lishi takidlandi.